Æртиссæдз азы фæрсæй-фæрстæм

 
Цыколайæгтæ Гуцъунаты Рамазан æмæ Темырхъанты Оляйы чындзæхсæвыл рацыд æртиссæдз азы. Йæ диссаг уый мидæг и æмæ ацы дыууæ адæймаджы кæрæдзийы æмбаргæйæ фæцардысты. Тæбæгътæ дæр ма куы базмæлынц, уæд дыууæ уды æхсæн ницы ныхæстæ рауайы. Фæлæ йæ амонд хъахъхъæнынмæ чи тырны, уый цæмæндæртæн дæр фæразы. Ноджы ма дыууæ уды зæрдæхудт райсынæй та æцæг уарзондзинад бахизы. 

Æфсад иуæй-иутæн дыууæрдæм хорздзинад æрхæссы. Фыццаджыдæр дзы нæлгоймагæн йæ уды фидардзинад разыны, ноджы ма дæ бафæнæд, æндæр дын ам хорз дæсныйад райсынæн дæр фадат скæндзысты. Рамазан ссис электромантер. Нæ рæстæгæн, наукон-техникон рæзты дугæн, агургæ æмæ æнæаргæ хъуыддаг. Йæ дæсныйады руаджы бирæ рæтты бакуыста. Электрон тых хыртт-мырт нæ уарзы. Йæ миниуджытæ йын цыфæнды хорз куы зонай, уæддæр дæ уды æдасдзинады сæраппонд  хъавгæйæ йемæ æвналын хуыздæр. Иу æнæарæхст бавнæлд æмæ дæ афтæ ныдздзæхстласдзæн æмæ дæ цæстытæ цæхæртæ акалдзысты. Ууыл дæ куы ныууадза, уæд дæ амонд, фæлæ…
 
Рамазан йæ дæсныйады сусæг фæзилæнтæ кæмæн бацамыдта, уыдон бирæ сты. Фæстейы дæ куы сурой, уæддæр ацы хъуыддаджы тагъд макуы бакæн, зæгъгæ-иу, алкæмæндæр бафæдзæхста. Куыстытæ бирæ сты, адæймаджы цард та - иу. Цыфæнды стыр мызд райсынæй дын зæрдæ куы бавæрой, уæддæр карды комыл цæуын не `мбæлы.

Йæ бинойнаг Оляйæ дæр йæ хъуыддаг хорз кæмæн æнтысы, ахæм специалист  рауад. Æвæццæгæн, нæ республикæйы дæр сылгоймаджы уæлæйы дарæс уый хуызæн рæсугъд скæрдынмæ дыккаг нæ арæхсы. Йе ’рмдзæф ноджы аивдæрæй кæйдæр фидауаг уæнгтыл разыны. Рады йæм чи лæууы, уыдонæн сæ фылдæр  чындздзон чызджытæ сты. Дарæсы руаджы амонд не ’ссардзынæ, фæлæ гыццыл кæмдæр уый дæр фæахъаз уыдзæн.
 
Ныртæккæ дæр Оля модæты мидæг цы æрхъуыдыдзинæдтæ ’вдисы, уыдон сылгоймæгты цæсты ахадынц, уымæн æмæ зонынц, ацы  хуыйæг йæ хъуыддаг сфæлдыстадон цæхæры бындурыл кæй аразы, уый. Æрдзæй рахæсгæ у йæ курдиат. Ахæм адæмтæ та гыццыл сты, стæй хицауадæй дæр рохуаты нæ баззайынц. Хæрзиуджытæ, хæрзиуджытæ… Гуцъунаты чындз Темырхъанты чызг райста нæ республикæйы раздæры Президент Дзасохты Алыксандры къухæй Кады гæххæт. 

Дыууæ уарзон уды куы цæрой, уæд сæ фæдыл зæнæг дæр рацæуы. Рамазан æмæ Оля цыппар чызджы ныййарджытæ сты. Сæ иуæй иннæ зæрдæмæдзæугæдæр рауад. Уæлдæр ахуыргондзинад райстой. Алчидæр дзы цы хъуыддæгтæ равзæрста, уыдонмæ арæхсынц, стæй ма ноджы ныййарджыты хорздзинад дæр æмбарынц. Цот арæх æрбамбырд вæййынц сæ райгуырæн къонайыл. Сæ иуæндæс хъæбулы æмæ дыууæ хъæбулы хъæбулимæ æрбалæууынц Рамазан æмæ Оляйы цур.

Ацы дыууæ хистæрæн се ’взонджы дуг хæст æрæййæфта. Нæ кæстæртæ фыдбылызæй хызт уæнт, фæлæ арæх сæ фыны уыцы уырыд бонтæм раздæхынц, цыма та бæстæ саумæлазон фестад, райсоммæ ахæм нывтæ рахæссынц. Æцæг, сыгъдæг арвыл хуры фыццаг тынтæ фенгæйæ, сæ зæрдæты бацæуы ныфс. Уый сæ кæстæрты аудындзинады хуыздæр бæрæггæнæн у.

Ацы рæстæгæн иу ахсджиаг домæн ис. Ома, цот хъуамæ кæрæдзийы уарзой. Бахъуыды заман дзы иу иннæйы уæлхъус балæууын фæраза. Зондæй, материалон фæрæзтæй, æфсымæры кæнæ хойы цард фæрогдæр кæнынмæ зивæджы цæстæй ма кæса. Сæ гыццылæй сын дихгонд цы нæ уыдис, уый хъуамæ зæронды бонтæм дæр ма байуарой. Уыдæттæ канд иу бинонтæ нæ, фæлæ не ’хсæнады иудзинадæн дæр стыр ахъаз фæуыдзысты.