Нырыккон професситы хъæбул - моделинг
Нæ тагъд иваг дунейы алы бон гуырынц ног куысты хуызтæ. Кæй зæгъын æй хъæуы, сæ равзæрд сæрмагондæй баст у æхсæнады хъуагдзинæдтимæ. Æмæ ахæм професситы ‘хсæн йæ бынат æрцахста æмæ дзы даргъ уидæгтæ ауагъта моделинг. Ирон æвзагмæ уыцы ныхас ратæлмац кæнынæн амал нæма ис. Сымах та йæ куыд ратæлмац кæниккат, зынаргъ газеткæсджытæ? Цалынмæ хъуыды кæнут, уæдмæ уал æрхæссæм, моделинг цы у, уый тыххæй Википедийæ скъуыддзаг. Моделинг у ахæм куысты фæз, кæцыйы модельы æддаг бакасты руаджы разæнгард кæнынц исты дзаума кæнæ хæрзиуæг. Сæрмагондæй моделинг у рекламæ. Рагæй дæр моделингы кад æхсæнад уæлæмæ нæ уадзы. Бирæты хъуыдымæ гæсгæ, нымад цæуы цъаммар æмæ ‘нæгъдау профессийыл. Фæлæ ацы æрдæмадæн дæр ис хъæздыг истори, ис дз йæхи хъайтартæ, йæхи æнтыстдзинæдтæ.
Вирджиния Ольдоини – афтæ хуины дунейы фыццаг фотомодель. Кæй зæгъын æй хъæуы, хуымæтæг чызг нæ уыд, хаста графиняйы ном. Адæм куыд дзурынц, афтæмæй уæлдай нымад уыд Наполен IIIæн. Сылгоймаджы рæсугъддзинады руаджы йæ бирæтæ зыдтой æмæ уарзтой. Уыцы адæмы нымæцмæ хаудта императоры къамисæг Пьер-Луи Пьерсон. Къамисæг скодта Вирджинияйæн цыппар сæдæ хуызистæй фылдæр – уæды рæстæджытæн уый уыд тынг бирæ.
Дарддæр модельтæ бахаудтой модæйы хæдзæртты къухтæм æмæ уыцы æрдæмад уайтагъд райдыдта ивын æмæ рæзын. Абон модельты ‘хсæн ис стыр хицæндзинæдтæ.
Подиумы модель – архайы дзаумæтты цардæгас равдыстыты. Ирдхуыз модельтæ уайтагъд æмæ рæсугъдæй раргом кæнынц дизайнерты æрхъуыды, аивæй равдисынц æрбацæугæ адæмæн дзаума.
Промо-модель – æрбахонынц сæ равдыстытæ, презентацитæ æмæ конференцитæм. Хъуамæ сын уа зæрдæмæдзæугæ æддаг бакаст, уой дзырдарæхст.
Фитнес-модель. Архайынц сæрмагондæй спортивон залты, дзаумæтты æмæ хæринаджы рекламæйы. Сæйрагдæр домæнтæм хауы – спортивон буарыконд.
Модельты хуызтæй нырыккондæр – plus-size. Ахæм модельтæ æвдисынц хæрзхуыз адæмæн дзаумæттæ. Уый у моделингы толерантон æрдæмад, æххуыс кæны сылгоймæгтæн сæхицæн аргъ кæнын æмæ сæ æрдзæй лæвæрд буарæн.
Се ‘ппæтæй фылдæр сты – фотомодельтæ. Ацы æрдæмады нæй карз арæнтæ. Модель вæййы мæллæг дæр, нард дæр, цыфæнды адæмы хаттæй. Сæ арæхдæр куыст у - буклеттæ æмæ каталогтæ. Рекламæйæн бахъæуынц сывæллæтты æмæ зæрæдты къамтæ дæр. Уымæ гæсгæ кæй фæнды бон йæхи бафæлварын у куыд фотомодель.
Парт-модель – ацы профессионалон модельты сæйраг хæрзиуæг у буары хицæн хай: къухтæ, былтæ, дзыккутæ, цæстытæ æмæ афтæ дарддæр. Сæ куыстмæ хауы хиахорæнтæ, нывæфтыдтæ, дзабыртæ аивæй равдисын.
Чи зоны уæм фæзынд фарста: ау, Ирыстоны дæр уыдæттæ ис? Ай-гъайдæр, ис, зынаргъ газеткæсæг. Ирыстоны фæсивæд рæстæджы домæнтæн дæтты бæлвырд дзуапп. Алцæмæ дæр арæхсæм, алцæмæн дæр дæттæм нæхи культурон ад æмæ хуыз. Цæмæй йæ базонæм, нæ республикæйы та куыд у хабар моделингимæ, уый тыххюй аныхас кодтам æрыгон модель Коцойты Эллинæимæ.
- Эллинæ, Ирыстоны цавæр уавæртæ ис модельтæн?
- Нæ республикæйы ис хорз уавæртæ модельы куыст райдайынæн. Ис дзы скъолатæ, уыдонæй иуы ахуыр кодтон æз дæр.
- Æмæ цавæр зонындзинæдтæ дæттынц модельты скъолайы?
- Ахуыр кæнæм къуыри æртæ хатты. Фыццаджыдæр дæ ахуыр кæнынц раст цæуын – модельтæн куыд æмбæлы, афтæ. Стæй «позинг» - куыд лæууын хъæуы дæ къамтæ дын куы исой, ууыл дзы ахуыр кæныныц. СОГУ-йы аивæдты факультетæй ахуыргæнæг нын лæвæрдта актерон ахуыртæ. Скъола дæтты замманайы фæрæзтæ – алы мæй архайдтам фотосесситы. Уымæ гæсгæ кусын куы райдыдтон, уæд хорз арæхсыдтæн уыцы хабæрттæм. Алы аз скъола саразы равдыст, уым ахуыргæнинæгтæн вæййы бар равдисын, цæуыл сахуыр сты, уый. Æмæ уый дæр у стыр ахъаз махæн.
- Эллинæ, цы у се ‘ппæтæй зындæр модельыл ахуыргæнгæйæ?
- Кæмæн куыд… Кæмæндæрты каблуктыл слæууын дæр зын вæййы (уый та æнæмæнгæй хъæуы ацы куысты). Мæнæн уæлдай зын уыд, Ирыстонæй дæр цæуын куысты фæдыл, абон нæма фæтых дæн уыцы зындзинадыл. Хæдзаруарзон дæн.
- Мадæлты арæх нæ фæфæнды, цæмæй сæ чызджытæ сæ цард моделингы фæзимæ сбæттой. Бирæ тар фæзилæнтæ ис уыцы æрдæмады. Стырдæр стереотип та у, чызджытыл дзаума къаддæрæй-къаддæр кæй фæкæны, уый. Уый æцæг у? Уæлдайдæр Ирыстоны?
- Ирыстоны моделинг æнæ дарæсæй къамтæм ницы бар дары. Æппындæр. Фыццаджыдæр, уый у адæймаджы фæндонæй аразгæ – чидæртæ сразы вæййынц, чидæртæ нæ. Фæлæ кæд, зæгъæм, республикæйæ цæуинаг дæ æмæ дæ фæнды рæзын уыцы фæзы, уæд дæ кæмдæрты хъæудзæн дæ куыстдæттæгты домæнтæм гæсгæ архайын.
- Бузныг дын, Эллинæ. Бирæ дын бантысæд.
Цæмæй йæ хуыздæр бамбарæм, нæ республикæйы фæлгæты моделинг куыд кусы, æмæ, чи зоны, кæйдæр карз хъуыдыкæнынад аивæм, уый тыххæй нæхи бацамыдтам Дзæуджыхъæуы дуканитæй иуæн. Дуканийы хицау нæ ‘рбахуыдта къабаты съемкæмæ. Уым бæлвырд бамбæрстам, моделинг æнцон куыст кæй нæу: иу æхсæз-авд хатты чызджытæ раивтой сæ дзаумæттæ тагъд-тагъдæй. Бацæттæ кодтой авд видеоæрмæджы æмæ систой дыууæ сæдæ къамæй фылдæр, кæцытæй æвзæрст æрцæудзысты иу ссæдз. Куыд бамбæрстам, афтæмæй алы модельы дæр ис бар æвзарын, цавæр дзаумайы æмæ цавæр уавæры куса, уый.
Бæлвырд ис зæгъæн, моделинг абон кæй у сæрмагонд професси. Ис ын йæхи хæрзиуджытæ æмæ фыдфæзилæнтæ. Фæлæ йæ кæд адæймаг йæ профессийыл нымайы æмæ дзы уыны фадат кусынæн æмæ архайынæн, уæд уый, мæ хъуыдымæ гæсгæ, у хорз хъуыддаг. Зынаргъ газеткæсджытæ, сымах та цавæр зæрдæ дарут моделингмæ куыд профессимæ?
Фарс бацæттæ кодта Мамиаты Дианæ
Къамтæ ист сты гом информацион фæрæзтæй
