Ирон аивады пехумпары номарæн изæр
Уæрæсейы Федерацийы æмæ Республикæ Цæгат Ирыстоны адæмон артист, номдзыд музыкант, фæндырдзæгъдæг, композитор, дирижер, ахуыргæнæг, фольклорист Гæздæнты Булат фарон фæхъуыд не 'хсæнæй. Фæлæ йæ ном æмæ бирæвæрсыг сфæлдыстадон цæхæр тавы аивадуарзджыты æмæ нæ культурæйы архайджыты алы фæлтæрты минæвæртты зæрдæтæ дæр.
Цæгат Ирыстоны Фæллойы фыццаг хъæбатыр Гæздæнты Булат йæ арм куыд фæлтæрдджын музыкант æмæ фæндырдзæгъдæг алкæддæр дардта Дзæуджыхъæу æмæ нæ республикæйы районы культурæйы артдзæстытыл æмæ сывæллæтты музыкалон скъолатыл. Зæрдиаг методикон æмæ практикон æххуыс цы ахуырадон артдзæстытæн кодта, уыдонæй сæ фыццаг уыд Алагиры Сывæллæтты аивады скъола. Хорз зонгæ уыд йæ бындурæвæрæг æмæ фыццаг директор, Уæрæсейы Федерацийы культурæйы сгуыхт кусæг Мытылаты Хадизæт æмæ скъолайы ахуыргæнджытимæ, ахуырдзауты алы фæлтæртимæ. Арæх дзы-иу йæ оркестримæ æмæ хицæнæй лæвæрдта концерттæ, каст лекцитæ ирон профессионалон æмæ адæмон музыкæйы тыххæй.
Ивгъуыд майрæмбоны Алагиры Сывæллæтты аивæдты скъолайы уыд Гæздæнты Булаты номарæн сфæлдыстадон изæр. Сарæзтой йæ ацы ахуырадон артдзæсты разамынд, ахуыргæнджытæ æмæ ахуырдзаутæ.
Хетæгкаты Къостайы номыл паддзахадон премийы лауреат, ирон фæндыры пехуымпар Гæздæнты Булат национ культурæмæ цы стыр æвæрæн бахаста, йæ царды стырдæр амондыл ирон культурæйæн лæггад кæнын кæй нымадта, уый тыххæй мысæн изæры райдайæны радзырдта скъолайы директоры хæдивæг хъомыладон куысты Хъайтыхъты Зæлинæ. Уый фæстæ уæрæх экраныл фысымтæ æмæ уазджытæ бакастыты, Гæздæнты Булат ацы скъолайы цы концерттæ арæзта, уыдонæй скъуыддзæгтæм. Уыцы аивадон изæрты номдзыд музыканты разамындæй Адæмон инструментты паддзахадон оркестримæ уæлдай арæхдæр зарыд æмæ фæндырæй цагъта суинаг курдиатджын фæндырдзæгъдæг, ныр республикон æмæ æппæтуæрæсеон музыкалон конкурсты лауреат Хъæцмæзты Сæрмæт.
Номдзыд музыкант Гæздæнты Булаты вокалон æмæ инструменталон уацмыстæй сæ хуыздæртæ йæ номарæн изæры ацагътой æмæ азарыдысты скъолайы ахуыргæнджытæ æмæ ахуырдзаутæ: Созæты Маринæ, Хъайтыхъты Зæлинæ, Джериаты Сæрмæт, Реуазты Агуындæ, Беккуызарты Тамарæ, Бураты Снежанæ, Коциты Армилæ, Хестанты Анастасия, Чихтисты Кристинæ, Кердыхъоты София, Айларты Настя.
Номарæн изæры архайдтой æмæ Гæздæнты Булаты тыххæй зæрдæагайгæ мысинæгтæ радзырдтой ацы рæнхъыты автор, Цæгат Ирыстоны паддзахадон филармонийы ирон адæмон инструментты оркестр «Ирыстон»-ы аивадон разамонæг æмæ дирижер Ходы Олег. Ходы-фырт æмæ номарæн изæры иннæ кадджын уазæг, Цæгат Ирыстоны педагогон колледжы студент, курдиатджын фæндырдзæгъдæг Георгий Степанов дала æмæ хъандзал фæндырæй ацагътой Гæздæнты Булаты музыкалон уацмыстæй цалдæр.
Сæрмагондæй Гæздæнты Булаты номарæн изæрмæ скъолайы ахуыргæнджытæ бацæттæ кодтой йæ цард æмæ бирæвæрсыг сфæлдыстадыл æмæ ирд аивадон курдиатыл дзурæг æрмæджыты цымыдисаг равдыст.
Номарæн изæры кæрон йæ саразджытæн æмæ уазджытæн арфæ ракодта скъолайы директор Икъаты Элизæ æмæ ахуыргæнæг Созæты Маринæ.
