«Ирон фæндыр»-ы аив зæлтæ
«Ирон фæндыр»-ы аив зæлтæ Дзæуджыхъæуы 13-17 октябрмæ уыд дунеон литературон фестиваль «Ирон фæндыр». Йæ аразджытæ сты Цæгат Ирыстоны Хетæгкаты Къостайы номыл паддзахадон университет, Æхсæнадон змæлд «Иудзинад», нæ республикæйы Культурæйы министрад æмæ Фысджыты цæдис. Йæ нысан у Цæгат Кавказы адæмты литературæ æмæ дзырдаивады нырыккон хæзнатимæ нæ бæстæйы цæрджыты зонгæ кæнын.
Фестиваль «Ирон фæндыр» арæзт цæуы дыккаг хатт. Йæ архайджытæ та сты нæ бæстæйы Фысджыты цæдисы разамынд, Цæгат Кавказ, Хуссар Ирыстон æмæ нæ республикæйы зындгонд фысджытæ, поэттæ æмæ литературæиртасджытæ æмæ публицисттæ.
Фарон ацы фестиваль арæзт æрцыд Иры номдзыд хъæбул Хетæгкаты Къостайы райгуырды 165 азы кадæн. Ацы хатт та йæ архайджытæ се сфæлдыстадон архайд сарæзтой Фыдыбæстæйы Стыр хæсты 80 азы бонмæ æмæ Иры зындгонд поэт, ахуыргонд, драматург, публицист, фыссæг, æхсæнадон архайæг Джыккайты Шамилы райгуырды 85 азы юбилейы номыл. Фестивалы архайджытæ - нæ бæстæйы зындгонд тæлмацгæнджытæ Нинæ Ягодинцева, Виталий Расторгуев, Валерий Латынин, Наталья Куличенко, Анна Харланова, Анжелика Салтанова, Татьяна Ческидова, Марина Ахмедова, Мясат Муслимова ирон æвзагæй уырыссаг æвзагмæ ирон литературæйы нырыккон историйы фыццаг хатт ратæлмац кодтой Фыдыбæстæйы Стыр хæсты чи архайдта, уыцы æдзард хъæбатыр æмæ курдиатджын поэтты уацмыстæ. Рауагътой сæ нæ бæстæйы чиныгуадзæнтæй иу - «Челнок»-ы, чиныг «В живом строю», зæгъгæ, ахæм номимæ. Дыккаг чиныг уыд номдзыд поэт, публицист, прозаик, драматург, æхсæнадон архайæг Джыккайты Шамилы æмдзæвгæты æмбырдгонд «И скорбь, и ярость, и любовь». Ардæм хаст æрцыдсты уырыссаг æвзагмæ тæлмацгондæй йæ хуыздæр поэтикон уацмыстæ. Раивтой сæ, уæлдæр цы тæлмацгæнджыты ранымадтам ацы æрмæджы, уыдон. Дыууæ чиныгæн дæр презентацитæ уыд Цæгат Ирыстоны паддзахадон университеты æмæ Дзæуджыхъæуы Уырыссаг академион театры. Фестиваль «Ирон фæндыр»-ы архайджытæн арæзт æрцыд пресс-конференци. Аив дзырды бæрæгбоны архайджытæй иу, зындгонд тæлмацгæнæг Виталий Росторгуев фембæлд Цæгат Ирыстоны паддзахадон университеты ирон филологийы факультеты ахуыргæнджытимæ æмæ студенттимæ. Радзырдта сын сфæлдыстадон куысты æмæ тæлмац кæныны сусæгдзинæдты тыххæй. Фестиваль «Ирон фæндыр»-ы аразджытæ, архайджытæ æмæ уазджытæ уыдысты Иры номдзыд поэт Хетæгкаты Къостайы райгуырæн хъæу Нары, федтой мемориалон музейон комплекс «Барбашовы быдыр», Дзуарыхъæуы Гæздæнты хъæбатыр авд æфсымæры цыртдзæвæн, федтой Советон Цæдисы дыууæ хатты Хъæбатыр Плиты Иссæйы хæдзар-музей, Хетæгкаты Къостайы номыл Ирон литературæйы музей. Цæгат Ирыстоны Абайты Васойы номыл гуманитарон æмæ социалон иртæстыты институты залы та уыд нæ республикæйы Фысджыты цæдисы 100 азы юбилей. Архайдтой дзы нæ бæстæйы Фысджыты цæдисы разамынд Валерий Латынин æмæ Нинæ Попова, Цæгат Кавказы республикæты æмæ нæ бæстæйы зындгонд фысджытæ, литературæиртасджытæ, публицисттæ, тæлмацгæнджытæ. Æмбырды ныхас цыд нæ бæстæйы Фысджыты цæдисы архайдыл, национ литературæты рæзтыл æмæ фестиваль «Ирон фæндыр»-ы ахадындзинадыл. Фестивалы архайæг тæлмацгæнджыты схорзæхджын кодтой Иры зындгонд поэт, тæлмацгæнæг, драматург Плиты Грисы майдантæй. Нæ бæстæйы Фысджыты цæдисы Кады гæххæттытæй схорзæхджын кодтой ирон нырыккон дзырдаивады дæсныты Дзасохты Музафер, Кокайты Тотрадз, Будайты Милуся, Къадзаты Станиславы. Фысджыты цæдисы ног уæнгтæн раттой æвдисæндартæ. Хæлардзинады республикон хæдзары дæр уыд Дагестаны адæмон поэт Магомед Ахмедов æмæ йæ фырт, публицист Мурад Ахмедовы иумæйаг æмбырдгонд, ирон æвзагмæ тæлмацгонд уацмысты чиныджы презентаци.
Дзæуджыхъæуы «Поэты кафе»-йы фестиваль «Ирон фæндыр»-мæ гæсгæ ма уыд нæ бæстæйы зындгонд рауагъдадтæй иу «Стихи»-йы алы азты уагъд чингуыты презентаци дæр.
Гасанты Валери, Дзæуджыхъæуы Хетæгкаты Къостайы номыл ирон литературæйы музейы хистæр зонадон кусæг
Авторы ‘рвыст къамтæ
