Костайы дзырд - адæмы иугæнæг
Ирон адæмы иузæрдион хъæбул, поэт, публицист, прозаик, драматург, нывгæнæг, æхсæнадон архайæг, ирон литературæйы бындурæвæрæг Хетæгкаты Къостайы райгуырды 165 азы юбилеимæ баст тематикон изæртæ æмæ фембæлдтытæ, равдыстытæ æмæ зонадон форумтæ, концерттæ æрмæст Хуссар æмæ Цæгат Ирыстоны нæ уыдысты. Нæ Иры фарны фыртæн йæ цард æмæ сфæлдыстадон гениалон сгуыхтæн кад кодтой нæ бæстæйы æмæ Цæгат Кавказы бирæ горæтты.
Бафиппайын хъæуы уый, æмæ суанг 2024 азы декабрмæ дæр Къостайы номимæ баст фембæлдтытæн сæ фарнхæссæг уаз таг нæ фехæлд!
Афтæ Цæцæны Республикæйы сæйраг горæт Грознайы республикон библиотекæйы уыд Хетæгкаты Къостайы æмдзæвгæты чиныг «Ирон фæндыр»-ы уацмысты цæцæйнаг æвзагмæ тæлмацты æмбырдгонды презентаци. Йæ саразджытæ сты Республикæ Цæцæн æмæ Цæгат Ирыстон-Аланийы Республикæйы Фысджыты цæдистæ æмæ Цæцæны Республикæйы сæйраг библиотекæйы разамынд æмæ кусджытæ.
Дзæуджыхъæуæй сфæлдыстадон балцы презентацийы номыл Грознамæ ацыдысты Цæгат Ирыстоны Фысджыты цæдисы сæрдар, Хетæгкаты Къостайы æмдзæвгæты чиныг «Ирон фæндыр»-ы цæцæйнаг æвзагмæ тæлмацы вариантмæ разныхас ныффыссæг, литературæиртасæг, филологон наукæты кандидат Хозиты Барис, нæ республикæйы Фысджыты цæдисы сæрдары хæдивæг, зындгонд прозаик, Хетæгкаты Къостайы номыл паддзахадон премийы лауреат Цомартаты Изæтбег, УФ-йы Фысджыты цæдисы уæнг, Хетæгкаты Къостайы æмдзæвгæтæ цæцæйнаг æвзагмæ ратæлмац кæныны æмæ сæ хицæн чиныгæй цæцæйнагау рауадзыны проекты автор, курдиатджын поэт æмæ тæлмацгæнæг Баситы Зæлинæ, нæ республикæйы адæмон поэт Торчынты Хъазыбег, Паддзахадон телерадиокомпани «Алани»- йы уацхæссæг æмæ амонæг ГаглойтыДжыккайты Светланæ æмæ ацы æрмæджы автор - Гасанты Валери, УФ-йы Фысджыты цæдисы уæнг, Хетæгкаты Къостайы номыл Ирон литературæйы музейы хистæр зонадон кусæг.
Презентацимæ Цæцæны Республикæйы сæйраг библиотекæйы уæрæх залмæ æрбацыдысты Цæцæны Республикæйы Парламенты Сæрдары хæдивæг Аднан Нагаев, Цæцæны Фысджыты цæдисы сæрдар, прозаик Аламахад Ельсаев, Цæцæны Республикæйы адæмон фыссæг Шарип Царуев, Цæцæны Республикæйы Æхсæнадон палатæйы сæрдары æххуысгæнæг Салавди Бичалов, цæцæйнаг æвзагмæ Хетæгкаты Къостайы «Ирон фæндыр» тæлмацгæнджытæ, сыхаг республикæйы сфæлдыстадон æмæ зонадон интеллигенцийы минæвæрттæ, библиотекæты кусджытæ, студенттæ æмæ чиныгкæсджытæ.
Цæцæйнаг æвзагмæ Хетæгкаты Къостайы «Ирон фæндыр» рацыд номдзыд поэты райгуырды 165 азы кадæн. Æмбырдгонд рухс федта Дзæуджыхъæуы. Йемæ ма иумæ уыциу рæстæг уагъд æрцыд «Ирон фæндыр»-ы иронæй уырыссаг æвзагмæ тæлмацты хицæн æмбырдгонд.
Цæцæны Республикæйы Фысджыты цæдис æмæ нæ республикæйы Фысджыты цæдисимæ нын фæстаг азты æнгом æмæ хæлар бастдзинæдтæ ис. Уыцы арфæйаг уавæр хорзæй зыны дыууæ республикæйы сфæлдыстадон интеллигенцийы иумæйаг хорз ахастытыл. Хетæгкаты Къостайы юбилеймæ ма иу аз хъуыд, афтæмæй Цæцæны Республикæйы Фысджыты цæдисы разамынд æмæ уæнгтæ бадзырдтой Баситы Зæлинæмæ, фæндыд сæ йе ’мдзæвгæтæ цæцæйнаг æвзагмæ ратæлмац кæнын æмæ сæ хицæн чиныгæй рауадзын. Баситы уæздан Зæлинæ сын сæ фæндонæн бузныг загъта, зæрдиаг арфæтæ сын ракодта, фæлæ сын йæ уарзæгой æмæ патриотон зæрдæйы уаг равдыста, Хетæгкаты Къостайы æмдзæвгæтæ йæхи поэзийы бæсты цæцæйнаг æвзагмæ ратæлмац кæнын æмæ сæ хицæн чиныгæй сæхи мадæлон æвзагыл рауадзыны хъуыды куы загъта, уæд уымæй. Уый та дзурæг у, Баситы Зæлинæйы зондахаст, «æз дæн»-оны æнæуаг равгæй хызт кæй у, ууыл, уый тыххæй Зæлинæ у уæлдай стырдæр æмæ буцгæнинагдæр арфæты аккаг. Зæрдæрухс æмæ амондджынæй цæрæд, йе сфæлдыстадæй Ир æмæ нæ бæстæйы адæмæн цин æмæ зонды фарн хæсгæйæ! Афтæмæй хъуыддаг ныхасæй сырæзт, Цæцæн æмæ Иры адæмы иугæнæг хъуыддагмæ, йæ рахæцæн æмæ цырв та - Хетæгкаты Къостайы æрдхæрæны уацмысты чиныг «Ирон фæндыр».
Презентацийы райдайæны Хозиты Барис нæ республикæйы Фысджыты цæдис æмæ сфæлдыстадон интеллигенцийы номæй зæрдиаг арфæ ракодта Хетæгкаты Къостайы æмдзæвгæтæ цæцæйнаг æвзагмæ ратæлмац, кæныныл чи бацархайдта, уыдонæн се ’ппæтæн дæр. Ратта сын нæ республикæйы Парламенты Кады грамотæтæ æмæ Республикæ Цæгат Ирыстон-Аланийы Мыхуыры комитеты Кады гæххæттытæ æмæ Арфæйы фыстæджытæ.
Презентацийы ма раныхас кодтой Цæцæны Республикæйы Парламенты Сæрдары хæдивæг Аднан Нагаев, Фысджыты цæдисы сæрдар Альмахад Ельсаев, Цæцæны Республикæйы адæмон фыссæг Шарип Цуруев, Цæцæны Республикæйы Æхсæнадон палатæйы сæрдары æххуысгæнæг Салавди Бичалов, нæ республикæйы Фысджыты цæдисы сæрдар Хозиты Барис, йæ хæдивæг, фыссæг Цомартаты Изæтбег, Республикæ Цæгат Ирыстон-Аланийы адæмон поэт Торчынты Хъазыбег, УФ-йы Фысджыты цæдисы уæнг, поэт, тæлмацгæнæг Баситы Зæлинæ, паддзахадон телерадиокомпани «Алани»-йы амонæг æмæ уацхæссæг Гаглойты Светланæ...
Презентацийы рæстæг фысымтæ æмæ уазджытæ ныхас кодтой Цæцæн æмæ Цæгат Ирыстоны ’хсæн культуронлитературон сфæлдыстадон бастдзинæдты истори æмæ сæ абон дæр фидар кæныныл. Уырыссаг, ирон æмæ цæцæйнаг æвзæгтыл кастыты Хетæгкаты Къостайы æмдзæвгæтæ. Презентацийы хаст æрцыд уынаффæ, цæмæй цæцæйнаг нырыккон поэтты æмдзæвгæтæ тæлмацгонд æрцæуой ирон æвзагмæ æмæ сæ рауадзæм хицæн чиныгæй. Цæцæны поэттæ æмæ фысджытæ та бакусой ирон нырыккон дзырдаивады дæсныты уацмыстæ цæцæйнаг æвзагмæ ратæлмац кæныныл æмæ сæ рауадзой хицæн чиныгæй.
Гасанты Валери, Хетæгкаты Къостайы номыл ирон литературæйы музейы хистæр зонадон кусæг. Баситы Зæлинæ æмæ Æлборты Азæйы ист къам
